Bu dünyaya gələnlər hamısı daimi qalsaydı, dünya bu qədər adamı
tutmazdı. Allah-Təala vaxtı çatanların canlarını almaq üçün ierarxiyada
mələklərn birinə, Əzrayıla vakant bir yer ayırdı və bu ağır missiyanı
qoydu onun boynuna. Başlanğıcda bəni-insan sayı az olduğu üçün Əzrayıl
öz işini uğurla görə bilirdi. Say çoxaldıqca iş də çoxaolırdı və ştatda
köməkçi yeri yox idi. Belə olanda deyəsən Əzrayıl digər bir mələklə-
Şeytanla əlaqəyə girib özünə köməkçi axtarmaq istədi.
Təsəvvürümdə belə
bir səhnə yaranır: Əzrayılın bu xahişi Şeytana ləzzət eləyir və o
şaqqanaq çəkərək Əzrayıla bir yox, istədiyi qədər köməkçi verə
biləcəyini söyləyir. Köməkçilərin siyahısını görəndə Əzrayılın gözlərinə
işıq gəlir, başa düşür ki, indii can almaq üzrə planı istədiyi qədər
artıqlaması ilə yerinə yetirə bilər. Şeytanın yazdığı əlifba ilə tanış
olmasam da, bir az məntiqlə düşünəndə Əzrayılın köməkçilərinin kimlər
ola biləcəyi hətta mənə də məlum olur.
Silah yaradan alimlər
Atom
silahı yaranandan Əzrayılı işi xeyli yüngülləşdi. İnsanlar
amerikanların bir bomba ilə Xirosimanı, o biri ilə Naqasakini yer
üzündən silən atom silahını məhv etməyə çalışmaq əvəzinə başqa
dövlətlərin də bu silaha sahib olması həvəsinə düşdülər və buna nail
oldular. Sonra bu da azlıq elədi, hidrogen, neytron bombaları
yaratdılar. Bu günə qədər də modernləşdirir, kamilləşdirilər ki, öz
sonlarını bir az da yaxınlaşdırsınlar. Aldığı həzzdən Əgrayıl əllərini
bir-birinə sürtür.
Texnogen qurğular
«Mədəniyyətin
sonu vəhşətmidir, nədir, əcəba?» deyən şair insan zəkasının inkişafının
axırda onun məhvinə gətirəcəyinə işarə edirdi. İnkişafın hər pilləsi
insan ömrünün qısalmasına, orqanizmin zəhərlənməsi və sıradan çıxmasına
səbəb olurdu və oldu. Müxtəlif zəhərli qazlar, maddələr, qurğularla
atmosferi o qədər çirkləndirdik ki, Arktika buzları əriməyə başladı,
yer üzünü daşqınlar, sunamilər, kataklizmlər bürüdü. Hətta kosmosdan
gələn zərərli şüaların qarşısını alan ozon qatını da şadaraya döndərdik,
deşik-deşik elədik, indii o şualar da Əzrayıla xidmət eləyir. Özümüzü
məhv eləmək üçün marafon yarışına çıxdıq, Əzrayıl ayağını ayağının
üstünə atıb şellənir və ləzzətlə qımışır…
Saxta dərmanlar
Yaradan
yaratdıqlarını müxtəlif bəlalardan hifz etməyi də bacarır. Müxtəlif
xəstəliklərdən, qəzalardan qurtarmaq üçün dərdini verən Allah dərmanını
da göstərdi. Şeytan buraya da barmağını qoydu və həmn dərmanlar şəfa
əvəzinə ölümə xidmət eləməyə başladı. Daha doğrusu, saxtalaşdırıb Xeyirə
xidmət etməlinin Şərə tərəf yönəltdik. Bəlkə də dünyada ən ağır
günahlardan biri dərmanların saxtalaşdırılmiasıdır. Sağalmaq ümidi,
istəyi ilə od qiymətinə aldığımız dərmanların bizi ölümümüzə
yaxınlaşdırdığını görməkdən dəhşətli, inamitirən bir hiss vamı görəsən?
Əzrayıl özünü klonlaşdıraraq apteklərin yanında durub ölüm növbəsinə
duranlara baxır və qarnı atdana-atdana gülür.
Narkotika zöhrəvi xəstəliklər və alkoqol
Əzrayılın
sədaqətli köməkçiləri. Bəlkə də Əzrayılın Allaha sədaqətindən daha çox
bunlar Əzrayıla sədaqətlidirlər. Yaxasına çökdüklərini yavaş-yavaş,
öldürməkdən həz ala-ala axırına çıxırlar. Onlara aludə olanların
ailələri, yaxınları, ətrafları da Şeytanın hipnozuna düşür, heç nə edə
bilmirlər. Adamlar bu bəlalardan xilas olmaq haqda düşünmək əvəzinə daha
güclü psixotroplar icad eləməyə, şeytani həzzin daha mənfur formalarını
düşünməyə, öz əlləri ilə ölümün yollarını hamarlamaq yarışına
çıxırlar. Əzrayıl şaqqanaq çəkir. Bu saydıqlarım Əzrayılın iri
miqyaslı köməkçiləridir. Ətrafımıza baxsaq yerli miqyasda ölüm mələyinin
çox sadiq köməkçilərini ətrafımızda da görə bilərik.Onlar özlərini
addımbaşı çox «uğur»la göstərirlər. Tanıdığınız tanışların bəzilərini
bir də nişan verimmi?
Keyfiyyətsiz ərzaqlar
Əslində
ərzaq özlüyünda cansızdır və Əzrayılın özünə cansız köməkçi seçməsi o
qədər də ağıla batmır. Çünki cansızın ala biləcəyi can miqdar mənasında o
qədər azdır ki, Əzrayıl öz işi ilə bərabər hələ xırda statistika
aparmağa da məcbur olardı. Ona görə də ərzağı yox, keyfiyyətsiz ərazağı
istehsal edəni, satanı özünə köməkçi götürdü. Əlbəttə Şeytanın zəmanəti
ilə. Yediklərimizə haram qatanlar, genləri modiyfikasiya edilmiş ərzaq
hazırlayanlar, zərərli, zəhərli maddələr qatanlar, vaxtı keçmiş
ərzaqları satanlar, uşaq yeməyini saxtalaşdıranlar, ərzaq məhsullarına
kübrə, pestisid, müxtəlif reagentlər qatanlar… birbaşa Əzrayılın
köməkçiləridir. Gördükləri işər də onların dediyimi təsdiqləyən
vəsiqələridir. Özü də belələri özlərinin də düşmənidir. Bunun
hazırladığını o yeyir, onun hazırladığını bu. Əzrayıl da oğrun-oğrun həm
onun başını sığallayır, həm də bunun. Potensial müştəridi axı…
Naşı həkimlər, saxta mollalar
Çox
maraqlı tandemdir. Sağaltmaq əvəzinə öldürən «təbib»lər, öldürüləni
birbaşa Cəhənnəmə istiqamətləndirən saxta mollalar. «Təbib»lərin meydana
çıxmasında Əzrayılın köməçiləri lap başlancıdan- uşaq bağçasından
fəaliyyətdə olurlar. Sonra məktəb, sonra universitet, sonra işə düzəldən
köməkçilər və adam olur Əzrayılın peşəkar köməkçisi. Əzrayıl onları
demək olar ki, adbaad tanıyır. Geyimləri də fərqlidir axı. Nə qədər ki,
naşı, rüşvətxor həkimlər (hakimlər və ümumiyyətlə bəndələr) var, Əzrayıl
çox arxayın və rahat gəzə bilər. Saxta mollalar da naşı həkimlərin
xətaların elə torpağa quyulayırlar ki, dünyasını dəyişən nə qədər
əməli-saleh olsa da, Cənnətin heç həndəvərinə də düşə bilmir. Saxta mola
onun boynuna elə günahlar şəlləyir ki, rəhmətlik yuxusunda da Sirat
körpüsünü keçə bilmir. Bəlkə də keçə bilsə idi, Yaradanın
inandıqlarından birinə yaxınlaşa, onu buraya göndərənlərin
hoqqalarından şikayətlənə bilərdi. Əzrayıl hirslənir, onların da yolunu
bağlayır.
Aman sürücü, vurma məni...
Sürücü
yox, qırıcı. Əzrayılın populyar, müasir, əvəzolunmaz köməkçiləri -
pulla «prava» alan, sükan arxasına sərxoş oturan, nasaz maşınla yola
çıxan, sürəti artırıb ötüşən sürücülər. Aldıqları canların sayını
müharibə qurbanları ilə müqayisə eləmək olar. Özü də müharibənin bir
həftəsini yol qəzalarının bircə günü ilə. Əzrayıl baxır ki, maşına 300
km/saat sürət qoyurlar, sonra da beş-altı dənə təhlükəsizlik balışı.
Başlayır haqlı olaraq, hırıldamağa. Bu sürətlə, bu sürücülərlə Əzrayılın
fəaliyyət poliqonu bütün yer kürəsi olur. Yer kürəsi bir yana, bizdəki
köməkçilərin sayından, işdəklərindən, hoqqalarından xəbəriniz varmı?
Gündə də dəstə-dəstə yenilərini istehsal edib buraxırıq. Əzrayıl
harınlayıb, indi işlərinin hamısını köməkçilərinin üstünə atır. Elə
köməkçiləri olan da işləyər? Əlbəttə işləməz. Elə-belə, gəlir, tabelə
qol çəkir, birbaşa öz əcəli ilə ölməlilərin siyahısına nəzər atır,
göndərir əlaqədar təşkilatlara. Qalan işlər köməkçilərlikdir. Onların da
sayı, bir deyil, beş deyil. Fikir vermisinizmi, Əzrayılın alternativi
olan, həyat, xoş xəbərlər gətirən digər mələyin, Cəbrayılın adı demək
olar ki, unudulub, keçib retro sənətkarlar siyahısına. Şou əhli ilə
müqayisə edəndə, bəzi «ulduz»lar kimi, Əzrayıl dəbdədir, gündəmdədir,
populyardır, həftənin hər günündə dəftərində vay yazılıb.
P.S.
Yazıda küfr, günah məqamlarım varsa, kaş Allah günahımdan keçsin, bəzən
söz ünavanına çatsın deyən belə «xod»lardan istifadə etməyə məcbur
oluram…
Bu dünyaya gələnlər hamısı daimi qalsaydı, dünya bu qədər adamı
tutmazdı. Allah-Təala vaxtı çatanların canlarını almaq üçün ierarxiyada
mələklərn birinə, Əzrayıla vakant bir yer ayırdı və bu ağır missiyanı
qoydu onun boynuna. Başlanğıcda bəni-insan sayı az olduğu üçün Əzrayıl
öz işini uğurla görə bilirdi. Say çoxaldıqca iş də çoxaolırdı və ştatda
köməkçi yeri yox idi. Belə olanda deyəsən Əzrayıl digər bir mələklə-
Şeytanla əlaqəyə girib özünə köməkçi axtarmaq istədi.
